Azərbaycan Qahirədə keçiriləcək Ümumdünya Şəhərsalma Forumunun 12-ci sessiyasında (WUF12) iştirak edəcək.

MEMAR.today saytı xəbər verir ki, Dövlət Şəhərsalma və Arxitektura Komitəsi Ümumdünya Şəhərsalma Forumunun (WUF12) 12-ci sessiyasında Azərbaycanın da iştirak edəcəyini açıqlayıb və tədbiri qlobal şəhərsalma siyasətinə təsir edən əsas beynəlxalq bir platforma adlandırıb. BMT-nin Məskunlaşma Proqramı tərəfindən təşkil olunan forum 4-8 noyabr tarixlərində Misirin paytaxtı Qahirə şəhərində keçiriləcək.

Azərbaycan WUF12-də şəhərsalma və memarlıq sahəsindəki nailiyyətlərini nümayiş etdirən bir pavilyon təqdim edəcək. Ölkəmiz “Daha yaxşı yenidənqurma: Dayanıqlı və dinc şəhər inkişafında Azərbaycanın yolu” mövzusu altında dayanıqlı şəhərlərin yaradılması, iqlim təşəbbüslərinin irəlilədilməsi, əməkdaşlığın inkişafı, islahatların həyata keçirilməsi, eləcə də Böyük Qayıdış proqramının innovativ həll yolları ilə bağlı müzakirələrə açıq olacaq. Dövlət Şəhərsalma və Arxitektura Komitəsinin nümayəndə heyəti davamlı şəhər inkişafı, innovasiya və iqlim davamlılığına dair dialoqlarda da iştirak edəcək. Bundan əlavə dünyanın dörd bir yanından foruma qatılacaq mütəxəssislərlə və maraqlı tərəflərlə də görüşlər baş tutacaq.