27 may (Trend) – Bu gün “Bakı KOB evi”ndə “Yaşıl nəqliyyat biznesi: imkanlar və perspektivlər” mövzusunda ictimai müzakirə keçirilən müzakirədə Daxili işlər nazirinin müavini, polis general-leytenantı Oqtay Kərimov respublika üzrə dövlət qeydiyyatına alınan nəqliyyat vasitələrinin və quraşdırılmış elektrik doldurma cihazının sayı haqqında statistik məlumatlar verib.

Müxbir: Sadiq Cavadov

Daxili işlər nazirinin müavini, polis general-leytenantı Oqtay Kərimov tədbirdə çıxış edərək bildirib ki, 2023-cü illə müqayisədə dövlət qeydiyyatına alınan elektrik mühərrikli və hibrid mühərrikli nəqliyyat vasitələrinin sayı iki dəfə artıb.

O qeyd edib ki, respublika üzrə dövlət qeydiyyatında olan ümumi nəqliyyat vasitələrinin 1 909 873 ədəddir.

“Onlardan elektrik mühərrikli 6974, hibrid mühərrikli isə 83 351 ədəddir. Bakı şəhərində dövlət qeydiyyatdan olan ümumi nəqliyyat vasitələrinin sayı 804 223 ədəddir. Elektrik mühərrikli 5 812, hibrid mühərrikli 57 530 ədəddir”, – nazir müavini əlavə edib.

Onun sözlərinə görə, 2023-cü illə müqayisədə respublika üzrə 291 məntəqədə 608 ədəd elektrik doldurma cihazı quraşdırılıb.

“Onlardan 160 məntəqə üzrə 426-sı Bakı şəhərində, 17 məntəqə üzrə 17-si Qarabağda, 2 məntəqə üzrə 4-ü Şərqi Zəngəzurda, 101 məntəqə üzrə 161-i digər ərazilərdədir.

Həmin cihazlardan 46 məntəqə üzrə 130-u “Azərişıq” ASC-də, 245 məntəqə üzrə 478-i isə digər fiziki və hüquqi şəxslərə məxsusdur”, – o bildirib.

Qeyd edək ki, tədbir Kiçik və Orta Biznesin İnkişafı Agentliyi (KOBİA) yanında İctimai Şuranın təşkilatçılığı, Azərbaycan Yerüstü Nəqliyyat Agentliyi (AYNA) və Daxili İşlər Nazirliyinin (DİN) dəstəyi ilə təşkil olunub.